Zgjidhen
5 projektet që do të vazhdojnë garën
në konkursin ndërkombëtar për rivitalizimin
e sheshit Iliria
Janë
shpallur 5 projektet që do të vazhdojnë garën
për projektin e rivitalizimit të sheshit Iliria.
Faza e parë e konkursit ndërkombëtar për
përzgjedhjen e projekteve në lidhje me rivitalizimin
e sheshit “Iliria” në qendër të
qytetit është zhvilluar për dy ditë
me rradhë ku u seleksionuan 5 projektet që do
të vazhdojnë garën. Në këtë
konkurs kanë paraqitur projektet e tyre 36 studio projektimi
tepër të njohura nga shumë vende të
botës. Faza përmbyllëse ku do të bëhet
zgjedhja e projektit fitues do të zhvillohet në
janar të vitit 2009. Në fazën e parë
nga ku dolën 5 projektet më të mira morën
pjesë studio projektimi nga Italia, Portugalia, Meksika,
Gjermania, Britania e Madhe, Japonia, SHBA, Spaja, Austria
etj. Këto projekte janë shqyrtuar nga juria e
cila përbëhet nga 7 anëtarë dhe presidenti
i nderit që është kryetari i Bashkisë
së Durrësit Vangjush Dako. Anëtarët
e kësaj jurie janë arkitekti Alain Coussaran nga
Franca, arkitekt Luca Zevi i Institutit Kombëtar Italian
të Arkitekturës, Alberto Monti i cili është
arkeolog në Universitetin e Parmës, arkitekti
Rocco Maragna nga Kanadaja, kritiku i artit Edi Muka, arkitekti
Viktor Dhimgjini dhe arkitekti Marin Biçoku nga Ministria
e Punëve Publike, transportit dhe telekomunikacionit.
Në lidhje me rivitalizimin e këtij sheshi administrata
e bashkisë ka parashikuar një vlerë të
përafërt prej 5 milion euro, e cila do të
investohet në sistemimin arkitektonik dhe hapësirave
të blerta. Ruajtja e trashëgimisë kulturore
të lashtë duke i dhënë gjallëri
qendrës së ardhshme të qytetit antik përbën
një nga synimet kryesore të organizatorëve
të këtij konkursi ndërkombëtar. 5 projektet
fituese vijnë nga 3 studio projektimi italiane, një
portugeze dhe një britanike. Këto 5 projekte që
do të vazhdojnë garën në janar 2009
për shpalljen e projektit fitues për rivitalizimin
e sheshit Iliria janë:
Projekti
i studios italiane të akitekturës “Ottopignatti
Studio Associato” me moton “Con Shesh Temporary”.
Kjo studio me qendër në Romë ka kryer shumë
projekte sheshesh publikë, porte dhe ndërtime
të tjera në Romë, Verona, Perugia, Ancona
etj. Kjo studio drejtohet nga arkitektët Lorenzo Pignatti
Morano dhe Ottone Pignatti. Ky projekt parashikon një
shesh të boshatisur nga funksionet e tjera përveç
atij të grumbullimit të njerëzve për
festa apo aktivitete të veçanta në qendër,
parkun arkeologjik dhe lulishten në pjesën perëndimore
dhe vendin e aktiviteteve, teatër, skena spektaklesh
etij në pjesën lindore.
Projekti
me moton “Linea D’Ombra” nga studio e
arkitekturës nga Portugalia e quajtur “da arquitectos”.
Kjo studio projektimi me qendër në Lisbonë
ka eksperiencë në sheshe publikë dhe godina
banimi dhe drejtohet nga arkitektët Ivan de Sousa dhe
Ines Antunes. Kjo studio ka projektuar disa sheshe publikë
në Lisbonë, Romë, Granada, Milano etj. Ky
projekt parashikon ndërtimin e një shkallare të
gjatë në pjesën perëndimore që
arrin kuotën e xhamisë dhe lulishtes duke e integruar
këtë pjesë në shesh, një shëtitore
të mbuluar në pjesën lindore si dhe një
godinë të re të lartë sa ndërtesa
e prefekturës ku parashikohet të vendoset biblioteka
etj.
Projekti
me moton “Folding”Studio e studios së arkitekturës
Michele Cro nga Roma. Kjo studio e drejtuar nga Michele
Cro dhe bashkëpunëtore me studion “Idea
Verde” ka punuar projekte sheshesh publikë dhe
godina të ndryshme në Romë, Venezia, Barcelonë
etj. Ky projekt parashikon disa rreshta pemësh në
anën lindore si një vend pushimi i ndarë
nga rruga e makinave, në pjesën perëndimore
një shëtitore dhe gjithçka përfshihet
në një shtresë gjigande të mbuluar në
disa pjesë me bar, kalldrëme, gurë mozaikë
etj.
Projekti
me moton “Suoli Sensibili” i studios italiane
të arkitekturës “Mascino e Agnoletto”.
Kjo studio që ndodhet në Venezia drejtohet nga
arkitektet Laura Mascino, Barbara Agnoletto, Giulia Lobba
dhe Anna Paola Pola. Kjo studio ka projektuar sheshe dhe
vepra të tjera private e publike në Venezia, Romë,
Milano, Japoni etj. Ky projekt parashikon një shesh
të pakalueshëm në rrugë makinash por
ku do të kryhen shumë aktivitete. Ai është
i bazuar në theksimin e rruginave të këmbësorëve,
theksimin me bordura zbukuruese të institucioneve,
lulishte në qendër të sheshit etj.
Projekti
me moton “Sun Dial” i studios së arkitekturës
3W Architecture Limited nga Britania e Madhe. Kjo studio
që ndodhet në Londër ka projektuar një
sërë sheshesh dhe objekte private e publike në
Londër, Bristol, Venezia, Dublin etj. Studio drejtohet
nga arkitektët Christian Coop dhe Thoma Papa. Ky projekt
ambicioz parashikon ndërtimin e orës solare më
të gjatë në botë që do të
jetë një kullë çeliku në qendër
me lartësi 70 metra si dhe shëtirore për
këmbësorë, shëtitore arkeologjike, lulishte
me palma dhe pjesë ujore(në formë minipishinash)
në shesh.
Qyteti
i Durresit ka emblemen e tij, e cila eshte zberthyer ne
flamur, ne vule e medialon. U be i mundur mbas shpalljes
se konkursit per emblemen e qytetit, hapur nen kujdesin
e Drejtorise se Muzeut.
